budaya  

SUARA GERAKAN TUNGKU APlI: LESTARIKAN BAHASA BUDAYA MEE,EKARI MEE MANA WEGAYAA DUBAIGAA EKOWAYAA MANAA KAMUU

banner 468x60
Cerita : JALAPAPUA.COM  “Mana kamu” maka mana wegai dana kouda makeko wegainekipeko gayakeko wowegai ena iyeidaigato, danama kabomanako kabokaguko daa”SUARA GERAKAN TUNGGU”
“Edoga mana kamu” Aki nome mana wegapeko akikidi akato egaa bokayaka, epimanato ewegai akiya maa ma anya maa emunaine kipeko
“Wiyago mana kamu” Mana wegaine kipeko akikidi doyake etii, gakouko kodani manako akoge nogei, akauwai nauwai, akone none, akama nama, aki iyoka ani iyoka, akaitai naitai, akukai noukai, akaitayoka naitayoka, gadi taka poko kiki ini mee ewawa nitita mee meitagidato, danama ito ini topeida make imotuwoya, kouda makeko uguwo duba akayake akagademe tiyake umitouko iyee deda muka-muka, danama umitou age wodogo ugu wodogo dugi nota nai bebe tewotiyaka gaima douma manakeike epawado make makida metamana wuu koyoka
“Widago mana mutoko” aki puya tewegai kouko kodani nogeima, meeka wegataa mana wodoki, amodoki, meepaiga wowegei, omowegai, yoko wege, tipeko benai kagumaidaka mana gomakiyakoyoka nogeima ini tuma negai, koudamakeko nogeima makodome manako puyako aki kiditiga umina epipuki awiyake wegapeko kimana itadodo ka manakidi wegage katine kodo mana wegatai bagekako danama, kauda makeko koumana peiyoo “ekina mege yuwaita apikopa yamekopa danama gadi taka poko kikidi” tiyakeko koumana egaa mumai danama gapidoke.
“Wiyago mana mutoko” Meeka kabomana kamuko kodani inii meeka mee wowagimakipeko emo kapedoke akima akiyokane, aki mumane, aki aiya, aki pigoke, gadi, taka, mani, kapeteto kikidi imototogo Maki epa komugatamee meidato, dana kouda makeko meeka iyeidaiga awitouyogoko emo ekegai epii mee eubai kidaka eniya eyakita tuma epakii, dana kouda mameko eubayako udoo agiya daba komaidaiga yamo tayawi uwo wainoutoudaiga dana kouda makeko diyo dou uno wido agape wido duba, koudamakeko meepaka emo tege mumai.
“Mana kamu idibibago ko” enamana ena iye piyee komugaine kipeko akaitai akukai, naitai noukai wiyaka totaa ma memuno ma newegayagakei epi eyuwetai ma dagiduba epimake tiyawii kouko manako kabomanaka.
“Mumaiyago mana kamu ko” kabo mana kabo ekaguko daa, kabomana komu idibi keiwado keike ini mee utoma gai dou danama kouda makeko wokeitai nogeima ini tuma, keimana keike akina meena anina meena kaine kodo tiyake wegapai kan nogeiman kouda makek dimi ma manama kouko ugatameya niko komugayawita kodokoyoka akikidi danama anikidi gatai ini utoma, makeko motine ma temotine mako egu momogi nipatoka.
Keiwado kemo ka ugai ebiyai tipa keike, ewouga ewo ebiya tipana ipa nayaikai anina akina inai meekede keyoko meeido
“Keimanaido keike Yameewa digiyoupai kidouda gepaka totai mana mewegagoo nogeima amanenowei”
Ogaika maki uwodide ibopeku watiya ( kota nabire samping laut ), ugata nagoko taniko wiya meukako amouwe dagida yamo ebekogidaida, putuko pituwo, agako gati, meeka tauwani ko, ogaika moto wiya wadoko enama mepina
Akiya mana kobo gadimimakai kikidi ini bokaidato ( dimi mapega )

( Oleh : Alpius Kugiyaipai ideidebi Giyai )

Leave a Reply

Your email address will not be published.

-------------------------------------- ----